ရီးရဲလ်မက်ဒရစ်နည်းပြ ကာလိုအန်ဆယ်လော့တီက ဗယ်လက်ကာနိုနဲ့ သုံးဂိုးစီသရေကျခဲ့တဲ့ပွဲစဉ်မှာ အသင်းရဲ့ ခံစစ်ပိုင်းအမှားတွေနဲ့ အခွင့်အရေးဖြုန်းတီးမှုတွေအပေါ် ညည်းညူခဲ့ပေမယ့် ရလဒ်ပိုင်းအပေါ် စိတ်မပူမိကြောင်း ပြောခဲ့ပါတယ်။
ခံစစ်ပိုင်းမှာ အာရုံစိုက်မှု လျော့ကျနေတာကို အတိုင်းသား မြင်တွေ့ခဲ့ရပေမယ့် အန်ဆယ်လော့တီကတော့ အကောင်းမြင်စရာတွေ အများအပြားလည်းရှိနေကြောင်း ပြောခဲ့ပါတယ်။
ရီးရဲလ်မက်ဒရစ်အသင်းဟာ ဒီပွဲမှာသာ အနိုင်ရခဲ့ရင် ဘာစီလိုနာကို ကျော်တက်ကာ ဦးဆောင်နိုင်မယ့် အခွင့်အရေးရှိခဲ့ပေမယ့် ခံစစ်ပိုင်းအမှားတွေနဲ့အတူ ဂိုးတွေပေးရကာ သရေတစ်မှတ်သာရခဲ့ပါတယ်။
အန်ဆယ်လော့တီက “ဒီပွဲက အမှားတွေအများအပြားနဲ့အတူ ပြီးပြည့်စုံတဲ့ ပွဲစဉ်တစ်ပွဲဖြစ်ခဲ့ပေမယ့် ခြေစွမ်းပိုင်းကတော့ ရလဒ်နဲ့ ကိုက်ညီခြင်းမရှိခဲ့ပါဘူး။ ကျွန်တော် မာယော့ကာ၊ လက်စ်ပါးမားတို့နဲ့ သရေပွဲတွေအပေါ် ပိုပြီးစိတ်ပူမိပေမယ့် အခုတော့ ကျွန်တော်တို့ ပြီးခဲ့တဲ့ရာသီက စိတ်ဓာတ်ပိုင်းနဲ့ အားထုတ်မှုပိုင်းမျိုး ပြန်ရှိနေပါပြီ။
ကျွန်တော် အနာဂတ်ကိုကြည့်လိုက်ရင် ၂၀၂၅ခုနှစ်က အရမ်းကို အကောင်းဘက်ရောက်နိုင်ပေမယ့် ကျွန်တော်ပြောတာလည်း မှားသွားနိုင်ပါတယ်။ ကစားသမားတွေက လိုချင်စိတ်နဲ့ စိတ်အားတက်ကြွမှုတွေကို ပြသထားတာ အရမ်းကောင်းပါတယ်။
ကျွန်တော်တို့ ကစားနေတဲ့ ပြိုင်ပွဲတိုင်းကို တိုက်ပွဲဝင်သွားမှာ ဖြစ်ပါတယ်။ ဒဏ်ရာတွေကြောင့် ပြဿနာများနေပေမယ့် ကျွန်တော်တို့ အကောင်းဆုံးလုပ်နေပါတယ်။ ဒီနေ့ညမှာလည်း အဓိက ကစားသမား ၇ဦးအထက် မပါဝင်ဘဲ ကစားခဲ့ရပါတယ်။ သူတို့အားလုံးပြန်လာရင် အသင်းက ဒီထက်အများကြီးပိုကောင်းလာမှာပါ။”လို့ ပြောခဲ့ပါတယ်။
ရီးရဲလ်မက်ဒရစ်အသင်းဟာ ကြားရက်မှာ ကမ္ဘာ့တိုက်ကြီးများဖလားပွဲစဉ်အဖြစ် ပါချူအာနဲ့ ရင်ဆိုင်ရမှာဖြစ်ပြီး လာမယ့်အပတ် တနင်္ဂနွေညမှာတော့ ဆီဗီလာကို အိမ်ကွင်းမှာ ဧည့်ခံကစားရဖို့ရှိနေပါတယ်။
