အက်သလက်တီကို – ဆယ်လ်တာဗီဂို (မြန်မာစံတော်ချိန် ဖေဖော်ဝါရီ ၉ ရက် နံနက် ၂း၃၀ နာရီ)
အက်သလက်တီကိုကတော့ ရှေ့ကနေ ပြေးနိုင်သမျှပြေးနေပါပြီ။ သူတို့ကံကောင်းတယ်ပဲ ပြောရမလား။ ရီးယဲလ်နဲ့ ဘာစီလိုနာက အခြေအနေပေါင်းစုံနဲ့ ရုန်းကန်နေရတယ်။ ကျန်အသင်းတွေကလည်း ခြေစွမ်းအတက်အကျများနေပြီး အက်သလက်တီကိုနဲ့ ရင်ဆိုင်ရမယ့်အချိန်ဆို အကျဘက်ပြနေကြတာများတယ်။ အခု ဆယ်လ်တာဗီဂိုကလည်း ဒီအတိုင်းပဲ။ နည်းပြသစ်နဲ့ ဟုတ်မလိုလိုနဲ့ဖြစ်ခဲ့တဲ့ ဆယ်လ်တာဗီဂို အခုတလော အရှိန်ပြန်လျော့သွားတာ တွေ့ရတယ်။ လျော့တာမှ ပြိုင်ပွဲစုံ နောက်ဆုံးကစားခဲ့တဲ့ (၆)ပွဲစလုံး နိုင်ပွဲမရှိခဲ့ဘူး။ တစ်နည်းပြောရရင် ၂၀၂၁ ထဲမှာ ဆယ်လ်တာဗီဂို နိုင်ပွဲလုံးဝမရသေးဘူး။ ကျန် (၅)ပွဲစလုံး ဂိုးတွေပေးခဲ့ရတဲ့ပုံစံမျိုးနဲ့ အက်သလက်တီကိုလို ချန်ပီယံလမ်းကြောင်းမှာ အရှိန်ကောင်းကောင်းနဲ့ ပြေးနေတဲ့အသင်းမျိုးကို ဘယ်လိုရင်ဆိုင်နိုင်မလဲဆိုတာ စဉ်းစားရင် အဖြေပေါ်နေတယ်။ ဆယ်လ်တာဗီဂိုတိုက်စစ်ကလည်းကျနေတော့ အက်သလက်တီကိုရဲ့ခံစစ်ကို ခြိမ်းခြောက်နိုင်ဖို့ကလည်း မလွယ်လှပါဘူး။ အက်သလက်တီကိုနဲ့ ဂိုးအများကိုပဲ ပိုကြိုက်နေမိတယ်။
