ရီးယဲလ်အသင်းနည်းပြ ဇီဒန်းသည် လာမည့် ၂၀၂၁-၂၂ ရာသီတွင် အသင်း၌ ဆက်ရှိနေမည်ဖြစ်ကြောင်း စပိန်အားကစားသတင်းစာ Diario Sport က ဖော်ပြခဲ့သည်။
အသက် (၄၈)နှစ်အရွယ်ရှိ ပြင်သစ်လူမျိုးနည်း ပြ ဇီဒန်းသည် အနာဂတ်တွင် ပြင်သစ်လက်ရွေးစင်အသင်းနည်းပြ ဒေးရွှမ့်၏ရာထူးကို ဆက်ခံမည်ဟု သတင်းများထွက်ပေါ်နေသည်။
သို့သော် ရီးယဲလ်အသင်းနှင့် ချုပ်ဆိုထားသည့် ဇီဒန်း၏ လက်ရှိစာချုပ်မှာ ၂၀၂၂ ဇွန် လ (၃၀)ရက်တွင် ကုန်ဆုံးမည်ဖြစ်ပြီး ၎င်းအနေဖြင့် စာချုပ်သက်တမ်း မကုန်ဆုံးမီ အသင်းမှထွက်ခွာလိုခြင်း မရှိကြောင်း Diario Sport က ဖော်ပြခဲ့ခြင်းဖြစ်သည်။
ပြင်သစ်နည်းပြ ဒေးရွှမ့်က ဇီဒန်းမှာ မိမိ၏နေရာကို ဆက်ခံမည့်သူဟု ပြောဆိုထားသော်လည်း သူ့အနေဖြင့် ပြင်သစ်အသင်းကို ၂၀၂၂ ကမ္ဘာ့ဖလားပြိုင်ပွဲပြီးဆုံးချိန်အထိ ကိုင်တွယ်လိုနေကြောင်း သိရသည်။
ထို့ကြောင့် ဇီဒန်းအနေဖြင့် လာမည့်ရာသီတွင် ရီးယဲလ်၌ ဆက်ရှိနေမည်ဖြစ်ပြီး အပြောင်းအလဲမဖြစ်နိုင်သေးကြောင်း Diario Sport က ဖော်ပြခဲ့သည်။
