ရီးယဲလ်အသင်းနည်းပြ ဇီဒန်းက မိမိအနေဖြင့် ဘာစီလိုနာအသင်းခေါင်းဆောင်မက်ဆီအား ဘာစီလိုနာအသင်းမှ ယခုရာသီကုန်တွင် ထွက်ခွာမည်ကို မမြင်တွေ့လိုကြောင်း ပြောကြားခဲ့သည်။
အသက် (၃၃)နှစ်အရွယ်ရှိ ဘာစီလိုနာတိုက်စစ်မှူး မက်ဆီသည် ယခုရာသီကုန်တွင် ဘာစီလိုနာအသင်းနှင့် စာချုပ်သက်တမ်းကုန်ဆုံးမည်ဖြစ်ပြီး လက်ရှိအချိန်အထိ စာချုပ်အသစ်အတွက် သဘောတူညီမှုမရသေးသလို၊ ၎င်း ဘာစီလိုနာအသင်း မှထွက်ခွာကာ စပိန်မြေကိုစွန့်ခွာတော့မည်ဟု သတင်းများ ထွက်ပေါ်နေသည်။
ထို့ကြောင့် ဇီဒန်းက ၎င်းအနေဖြင့် မက်ဆီအားဘာစီလိုနာမှ မထွက်ခွာစေလိုကြောင်းနှင့် မက်ဆီဆက်ရှိနေခြင်းမှာ လာလီဂါပြိုင်ပွဲအတွက်လည်း ကောင်းမွန်ကြောင်း ပြောကြားခဲ့ခြင်းဖြစ်သည်။
ဇီဒန်းက ”ဒီ El Clásico ပွဲဟာမက်ဆီအတွက်နောက်ဆုံး El Clásico ပွဲစဉ်ဖြစ်လာမှာကို ကျွန်တော်အလိုမရှိပါဘူး။ သူ့အနေနဲ့ ဘာစီလိုနာမှာ ဆက်နေသင့်ပြီး ဒီနေရာဟာ သူ့အတွက်အသင့်တော်ဆုံးပါ။ မက်ဆီဆက်ရှိနေတာဟာ လာလီဂါအတွက်လည်း ကောင်းမွန်ပါတယ်။ မက်ဆီ ဘယ်လိုကစားသမားလဲဆိုတာကိုလည်း ကျွန်တော်တို့အားလုံး သိပါတယ်။ ဘာစီလိုနာကနေ သူမထွက်ခွာဖို့ မျှော်လင့်ပါတယ်” ဟုပြောကြားခဲ့သည်။
