PSG အသင်းသည် ပြင်သစ်ကြယ်ပွင့်တိုက်စစ်မှူး အမ်ဘာပေကို ဆက်ထိန်းထားနိုင်ရန်အတွက် အစွမ်းကုန်ကြိုးပမ်းလျက်ရှိပြီး အားကစားသမိုင်းတစ်လျှာက် တန်ဖိုးအမြင့်ဆုံးစာချုပ်အဖြစ် ၁၀ နှစ်စာချုပ်အတွက် ယူရိုတစ်ဘီလျံဖြင့် ကမ်းလှမ်းရန် စီစဉ်နေကြောင်း သတင်းများ ထွက်ပေါ်လျက်ရှိသည်။
ယင်းသတင်းကို ရီးယဲလ်မက်ဒရစ်အသင်း၏သတင်းများ အဓိကရေးသားဖော်ပြသည့် Defensa Central သတင်းဌာနက ဖော်ပြခဲ့ခြင်းဖြစ်ပြီး နာမည်ကြီး အားကစားသတင်းဌာန Goal အပါအဝင် အခြား မီဒီယာများကလည်း ပြန်လည်ကိုးကား၍ ဖော်ပြလျက်ရှိသည်။ အသက် ၂၄ နှစ်ရှိပြီဖြစ်သူ အမ်ဘာပေ၏ လက်ရှိစာချုပ်မှာ ၂၀၂၄ ခုနှစ်အထိ ဖြစ်ပြီး တစ်နှစ်ထပ်မံတိုးမြှင့်နိုင်သည့်အချက် ပါဝင်သည်။ သို့သော် ၎င်းက စာချုပ်သစ်ချုပ်ဆိုရန် ဆန္ဒမရှိကြောင်း ပြီးခဲ့သည့်ဇွန်လအတွင်း PSG အသင်းထံ အကြောင်းကြားစာပေးပို့ခဲ့သည်။
ထို့ကြောင့် PSG အသင်းအနေဖြင့် ၎င်းင်းအား အသင်း၌ ဆက်ထိန်းထားနိုင်ရန် အစွမ်းကုန်ကြိုးပမ်းနေခြင်းဖြစ်ပြီး အားကစားသမိုင်းတစ်လျှောက် စံချိန်တင်အဖြစ် ယူရိုတစ်ဘီလျံတန်ဖိုးရှိသည့် စာချုပ်ဖြင့် ကမ်းလှမ်းရန် စီစဉ်နေခြင်းဖြစ်သလို ကာတာစော်ဘွားဖြစ်သူကလည်း ခွင့်ပြုပေးထားပြီဖြစ်ကြောင်း သိရသည်။ PSG အသင်းဥက္ကဋ္ဌ အယ်လ်ခီလိုင်ဖီက မိမိတို့အနေဖြင့် ကမ္ဘာ့အကောင်းဆုံးကစားသမားကို ပြောင်းရွှေ့ကြေးအလွတ်ဖြင့် ထွက်ခွာခွင့်ပြုမည်မဟုတ်ကြောင်းနှင့် အသင်း၌ လာမည့်ရာသီ ဆက်နေချင်ပါက စာချုပ်သစ် ချုပ်ဆိုရမည်ဖြစ်ကြောင်း သတိပေးထားပြီး ဇူလိုင်လမကုန်မီ အဖြေပေးရမည်ဖြစ်သည်။
PSG အသင်းသည် အမ်ဘာပေကို ခေါ်ယူစဉ်က ကမ္ဘာတစ်ဝန်း ဒုတိယပြောင်းရွှေ့ကြေးအမြင့်ဆုံးအဖြစ် ယူရိုသန်း ၁၈၀ ပေးချေခဲ့ရသလို ပြီးခဲ့သည့်နှစ် နွေရာသီက စာချုပ်သက်တမ်းတိုးမြှင့်ရာတွင်လည်း ကမ္ဘာ့စံချိန်တင်လစာအဖြစ် တစ်လလျှင် ယူရို ၄ ဒသမ ၆ သန်းအထိ ပေးချေနေရသည်။ ထို့ကြောင့် ၎င်းအား ပြောင်းရွှေ့ကြေးအလွတ်ဖြင့် ထွက်ခွာခွင့်ပြုရန် ဆန္ဒမရှိဘဲ ၂၀၂၅ ခုနှစ်အထိ သက်တမ်းတိုးပါက လာမည့်နှစ်တွင် ရီးယဲလ်အသင်းသို့ရောင်းချရန် စီစဉ်ထားကြောင်း သုံးသပ်မှုများရှိနေသည်။
အကယ်၍ စာချုပ်သက်တမ်းတိုးရန် ငြင်းဆန်ပါက ယခုနွေရာသီမှာပင် ရောင်းချဖွယ်ရှိပြီး ပြောင်းရွှေ့ကြေးကို ယူရိုသန်း ၂၀၀ အထိ တောင်းဆိုဖွယ်ရှိကြောင်း ပြင်သစ်အခြေစိုက် RMC Sport ရုပ်သံက ခန့်မှန်းဖော်ပြထားသည်။ အမ်ဘာပေသည် PSG အသင်းအတွက် ခြောက်ရာသီအတွင်း ပြိုင်ပွဲစုံ ပွဲ ၂၆၀ ကစား၊ ၂၁၂ ဂိုးသွင်းယူထားပြီး အသင်းသမိုင်းတစ်လျှောက် ဂိုးအများဆုံးကစားသမားအဖြစ် ရပ်တည်လျက်ရှိသည်။
