ရီးယဲလ်မက်ဒရစ်အသင်းသည် ဂျူဗင်တပ်စ်အသင်းမှ ဆားဘီးယားလက်ရွေးစင် တိုက်စစ်မှူး ဗလာဟိုဗစ်အား တစ်ရာသီ အငှားဖြင့်ခေါ်ယူရန် စီစဉ်နေကြောင်း စပိန်သတင်းစာ SPORT က ဖော်ပြခဲ့သည်။
ရီးယဲလ်မက်ဒရစ်အသင်းသည် ပြီးခဲ့သည့်ရာသီကုန်တွင် အသင်းနှင့်လမ်းခွဲပြီးနောက် ဆော်ဒီကလပ် အယ်လ်အစ်တီဟတ် အသင်းထံသို့ ပြောင်းရွှေ့သွားခဲ့သည့် ပြင်သစ်ဝါရင့်တိုက်စစ်မှူး ဘန်ဇီမာ၏နေရာတွင် အစားထိုးရန် ထိပ်တန်းတိုက်စစ်မှူးတစ်ဦး ရှာဖွေနေကြောင်း သိရှိရသည်။
ရီးယဲလ်မက် ဒရစ်အသင်းသည် PSG တိုက်စစ်မှူး ဘာပေကို ခေါ်ယူရန် ကြိုးပမ်းနေသော်လည်း ၎င်းကို ယခုနွေတွင် ခေါ်ယူမည်ဆိုပါက ပေါင် သန်း ၂၀၀ အထိ အသုံးပြုရဖွယ်ရှိနေကြောင်း သိရှိရသည်။ ထို့ကြောင့် ရီးယဲလ်မက်ဒရစ် အသင်းသည် ဘာပေအား PSG အသင်းနှင့် စာချုပ်သက်တမ်းကုန်ဆုံးမည့် ၂၀၂၄ နွေရာသီတွင် ပြောင်းရွှေ့ကြေးအလွတ်ဖြင့် ခေါ်ယူလိမ့်မည်ဟု ဥရောပမီဒီယာများက သုံးသပ်နေကြသည်။
ရီးယဲလ်မက်ဒရစ်အသင်းအနေဖြင့် အသင်းအဓိကကစားသမား ဘန်ဇီမာ ထွက်ခွာသွားသည့်တိုက်စစ်နေရာအတွက် အက်စ်ပန်ညိုအသင်းမှ စပိန်ဝါရင့်တိုက်စစ်မှူး ဟိုဆေးလူ (၃၃ နှစ်) အား တစ်ရာသီအငှားဖြင့် ခေါ်ယူထားသည်။ သို့သော် ဟိုဆေးလူမှာ အဓိကချန်ပီယံဆုများကို စိန်ခေါ်ရန် လုံလောက်မှုမရှိဟု ယူဆနေကာ ယခုအခါ ဂျူဗင်တပ်စ်တိုက်စစ်မှူး ဗလာဟိုဗစ်အား ခေါ်ယူရန် ကြိုးပမ်းလာခြင်းဖြစ်ကြောင်း သိရှိရသည်။
SPORT ၏ ဖော်ပြချက်အရ ရီးယဲလ်မက်ဒရစ်အသင်းသည် ဗလာဟိုဗစ်အား တစ်ရာသီအငှားအတွက် ယူရို သန်း ၂၀ အထိ ပေးချေရန် ဆန္ဒရှိနေပြီး ယင်းအငှားစာချုပ်တွင် အဆင်ပြေပါက အပြီးသတ်ခေါ်ယူခွင့် ရှိသည်ဆိုသောအချက်ကိုပါ ထည့်သွင်းမည် ဖြစ်ကြောင်း သိရှိရသည်။
အသက် ၂၃ နှစ်အရွယ်ရှိ ဗလာဟိုဗစ်သည် ပြီးခဲ့သည့်ရာသီက ဂျူဗင်တပ်စ်အသင်းအတွက် ပြိုင်ပွဲစုံ ၄၂ ပွဲတွင် ၁၄ ဂိုးသာ သွင်း ယူနိုင်ခဲ့ပြီး အသင်းနည်းပြ အယ်လီဂရီ၏ နည်းစနစ်များကြောင့် အသင်းတွင် မပျော်မရွှင်ဖြစ်နေကြောင်း သတင်းထွက်ပေါ်နေ သည်။ လက်ရှိတွင် ဗလာဟိုဗစ်အား ခေါ်ယူရန် ပရီးမီးယားလိဂ်ထိပ်သီး ချယ်လ်ဆီးအသင်းကလည်း စိတ်ဝင်စားနေပြီး ဂျူဗင်တပ်စ် အသင်းက ထိုက်တန်သည့်ကြေးရပါက ရောင်းထုတ်ဖွယ်ရှိနေကြောင်း သိရသည်။
ရီးယဲလ်အသင်းကမူ ဗလာဟုုိဗစ်အား အငှားဖြင့် ခေါ်ယူနိုင်မည်ဟု ယုံကြည်နေပြီး ယင်းမှာ ငွေကြေးလိုအပ်နေသည့် ဂျူဗင်တပ်စ် အသင်းအတွက်လည်း အဆင်ပြေမည့်အနေအထားဖြစ်ကြောင်း သိရသည်။
