ဆော်ဒီပရိုလိဂ်ကလပ် အယ်လ်အစ်တီဖာအသင်းသို့ ပြောင်းရွှေ့တော့မည့် လီဗာပူးလ်အသင်းမှ အင်္ဂလန်လက်ရွေးစင်ကွင်းလယ်လူ ဟန်ဒါဆန်သည် အသင်းသစ်နှင့် မပူးပေါင်းမီ ကလပ်အသင်းဖော်များကို နှုတ်ဆက်စကားဆိုခဲ့ကြောင်း သိရသည်။
ဟန်ဒါဆန်သည် ပြီးခဲ့သည့်သောကြာနေ့က မန်ချက်စတာမြို့တွင် အယ်လ်အစ်တီဖာအသင်းနှင့် ဆေးစစ်မှုခံယူခဲ့ပြီး သူ၏ ၁၂ နှစ်တာ လီဗာပူးလ်ကစားသမားဘဝကို အဆုံးသတ်စေခဲ့သည်။ အယ်လ်အစ်တီဖာအသင်းသည် Public Investment Fund (PIF) ၏ ဘဏ္ဍာရေးထောက်ပံ့ပေးသည့် ထိပ်သီးလေးသင်းစာရင်းတွင် မပါဝင်ခြင်းကြောင့် ဟန်ဒါဆန်၏ပြောင်းရွှေ့ကြေး ပေါင် ၁၂ သန်းကို အရစ်ကျပေးချေသွားမည်ဖြစ်သည်။
အသက် ၃၃ နှစ်အရွယ်ရှိ ဟန်ဒါဆန်သည် ကလပ်အသင်းဖော်ဟောင်း ဂျရတ် နည်းပြအဖြစ်တာဝန်ယူထားသည့် အယ်လ်အစ်တီဖာအသင်းတွင် တစ်ပတ် ပေါင် ခုနစ်သိန်းဝန်း ကျင် ရရှိမည်ဖြစ်ကြောင်း သိရသည်။ ၎င်းအနေဖြင့် အသင်းမပြောင်းရွှေ့မီ လာမည့်ရာသီ၌ လီဗာပူးလ်အသင်းတွင် ကစားခွင့်ရမည့် ပွဲကစားချိန်၊ အသင်း၌ သူ၏အနာဂတ်အနေ အထားများကို နည်းပြ ယာဂန်ကလော့ပ်နှင့် ဆွေးနွေးပြီးနောက် အသင်းမှ ထွက်ခွာရန် ဆုံးဖြတ်ခဲ့ခြင်းဖြစ်သည်။
ထို့ပြင် ဟန်ဒါဆန်သည် အရှေ့အလယ်ပိုင်းဒေသသို့ ပြောင်းရွှေ့ခြင်းကြောင့် သူ၏လက်ရွေးစင်ကစားသမားဘဝကို သက်ရောက်မှုရှိမည့်အပေါ် အင်္ဂလန်အသင်းနည်းပြ ဆောက်ဂိတ်နှင့်လည်း ဆွေးနွေးခဲ့ကြောင်းသိရသည်။
ဟန်ဒါဆန်အနေဖြင့် လီဗာပူးလ်အသင်းတွင်ကစားသည့် ၁၂ နှစ်တာအတွင်း ပရီးမီးယားလိဂ်နှင့် ချန်ပီယံလိဂ်အပါအဝင် မေဂျာဖလား ခုနစ်လုံး ရရှိခဲ့သည်။
