အာဆင်နယ်အသင်းသည် ဝက်စ်ဟမ်းအသင်းမှ အင်္ဂလန်လက်ရွေးစင်ကွင်းလယ်လူ ဒက်ကလန်ရိုက်နှင့် အေဂျက်စ်အသင်းမှ ဒတ်ချ်လက်ရွေးစင်နောက်ခံလူ တင်ဘာတို့ကို ခေါ်ယူမှုအား ယခုတစ်ပတ်အတွင်း အပြီးသတ်မည်ဖြစ်ကြောင်း သိရသည်။
ဒက်ကလန်ရိုက်၏ ပေါင် ၁၀၅ သန်းတန်အပြောင်းအရွှေ့မှာ ၉၅ ရာခိုင်နှုန်း ပြီးဆုံးနေကာ အပြီးသတ်လက်မှတ်ရေးထိုးရန်သာ ကျန်ရှိတော့ပြီး ကနဦးပြောင်းရွှေ့ကြေး ပေါင် သန်း ၄၀ ခန့်ပေးချေရမည့် တင်ဘာနှင့်မူ ပုဂ္ဂိုလ်ရေးသဘောတူညီမှု ရရှိထားခဲ့ပြီးဖြစ်သည်။
ယင်းကစားသမားနှစ်ဦးစလုံးကို ဆေးစစ်ခြင်းအား လာမည့်ရက်ပိုင်းအတွင်း ပြုလုပ်သွားဖွယ်ရှိပြီး အပြောင်းအရွှေ့အပြီးသတ်မှုမှာ ယခုရက်သတ္တပတ်ကုန်ပိုင်းတွင် ဖြစ်ဖွယ်ရှိကြောင်း Daily Mail သတင်းစာက ရေးသားခဲ့သည်။
ဒက်ကလန်ရိုက်၏ပြောင်းရွှေ့ ကြေးအတွက် အသင်းနှစ်သင်းအကြား သဘောတူညီမှု ရရှိထားပြီး ပေးချေရမည့်ကာလ အတိုင်းအတာကိုသာ ဆက်လက်ညှိနှိုင်းနေခြင်းဖြစ်သည်။
ဝက်စ်ဟမ်းအသင်းသည် ကနဦးပြောင်းရွှေ့ကြေး ပေါင် သန်း ၁၀၀ ကို ၂၀၂၅ ခုနှစ်အစတွင် အကျေရယူလိုပြီး အာဆင်နယ်ကမူ လေးနှစ်တာကာလအတွင်း ပေးချေသွားရန် ဆန္ဒရှိသောကြောင့် ဆွေးနွေးညှိနှိုင်းလျက်ရှိသည်။
တင်ဘာ၏အပြောင်းအရွှေ့မှာမူ မူအားဖြင့် သဘောတူထားပြီး စာချုပ်ပါအသေးစိတ်အချက်အလက်များ ညှိနှိုင်းရန်သာ ကျန်ရှိတော့ခြင်းဖြစ်သည်။ အာဆင်နယ်အသင်းသည် ချယ်လ်ဆီးမှ ဂျာမန်တိုက်စစ်ကစားသမား ကိုင်ဟာဗက်ဇ်ကို ကနဦးပြောင်းရွှေ့ကြေး ပေါင် ၆၅ သန်းဖြင့် ခေါ်ယူထားသည်။
