ဘာစီလိုနာအသင်း၏ စိတ်ဝင်စားမှုခံနေရသည့် အာဆင်နယ်နည်းပြ အာတီတာက မိမိအနေဖြင့် လက်ရှိအသင်း၌ သာ ပျော်ရွှင်နေကြောင်း တုံ့ပြန်ပြောကြား သည်။
ဘာစီလိုနာအသင်းသည် အနာဂတ်ကာလတွင် လက်ရှိနည်းပြ ဇာဗီ၏နေရာ အစားထိုးရန်အတွက် အာတီတာကို ရည်ရွယ် ထားကြောင်း သတင်းများထွက်ပေါ်လျက်ရှိသည်။
သို့သော် ယင်းသတင်းများနှင့်ပတ်သက်၍ အာတီတာက “ကျွန်တော်ပြောနိုင်တာက အခုရှိနေတဲ့နေရာမှာ အရမ်းပျော်နေ ပြီး အဲဒီလိုရှိနေခွင့်ရလို့လည်း ဂုဏ်ယူပါတယ်။ အခုအချိန်မှာ ဘာစီလိုနာက တကယ်ကောင်းတဲ့ လမ်းကြောင်းပေါ် ရောက်နေပါပြီ။ သူတို့ဆီမှာ အသင်းရဲ့ဂန္ထဝင်ဖြစ်တဲ့ အံ့မခန်းနည်းပြတစ်ဦးလည်းရှိနေပြီလို့ ကျွန်တော်ထင်တယ်။ ခင်ဗျားတို့အနေနဲ့ အဲဒါကို လေးစားမှုထားရပါမယ်”ဟု တုံ့ပြန်ပြောကြားသည်။
အာတီတာ (၄၀ နှစ်) သည် ဘာစီလိုနာအသင်း၏ အကယ်ဒမီထွက်ကစားသမားဖြစ်ပြီး ဘာစီလိုနာ (ဂ) နှင့် (ခ) အသင်း၌ ကစားဖူးသော်လည်း စီနီယာအသင်းတွင်မူ ကစားခွင့်မရခဲ့ကြောင်း သိရသည်။
