PSG အသင်းသည် မန်စီးတီးအသင်းမှ ပေါ်တူဂီကွင်းလယ်တိုက်စစ်ကစားသမား ဘာနာဒိုဆေးလ်ဗားအား ခေါ်ယူနိုင်ရန်အတွက် အသင်းဂိုးသမား ဒွန်နာရမ်မာနှင့် ကွင်းလယ်လူ ဗာရက်တီတို့ကို အလိုက်ပေးကမ်းလှမ်းသွားဖွယ်ရှိကြောင်း သိရသည်။
ပြင်သစ်မီဒီယာ Foot Mercato က လူးဝစ်အန်နရီကေး၏ PSG အသင်းသည် ဘာနာဒိုဆေးလ်ဗားအတွက် အဓိက ကစားသမားနှစ်ဦးကို အလိုက်ပေးကမ်းလှမ်းပြီး ခေါ်ယူနိုင်ရန် မျှော်လင့်နေသည်ဟု ရေးသားခဲ့သည်။
ထို့ပြင် ကစားသမားဖြစ်သူကိုယ်တိုင်ကလည်း PSG အသင်းသို့ပြောင်းရွှေ့ရန် ဆန္ဒရှိနေကြောင်း ယင်းသတင်းတွင် ဖော်ပြထားပြီး PSG အားကစားဒါရိုက်တာ လူးဝစ်ကမ်ပို့စ်နှင့် မန်စီးတီးဘောလုံးဒါရိုက်တာ ဘီဂီရီစတိန်းတို့အကြား ကစားသမားလဲလှယ်မှု အစီအစဉ်အတွက် ဆွေးနွေးမှုများ ဆက်လက်ပြုလုပ်နေကြောင်း သိရသည်။
အသက် ၂၈ နှစ်ရှိပြီဖြစ်သူ ဘာနာဒိုဆေးလ်ဗားသည် ၂၀၁၇ ခုနှစ်တွင် မိုနာကိုအသင်းမှ ပြောင်းရွှေ့ကြေး ပေါင် ၄၃ သန်းဖြင့် မန်စီးတီးအသင်း သို့ ရောက်ရှိလာပြီး အသင်း၏အဓိကအခန်းကဏ္ဍတွင် ပါဝင်ခဲ့သည်။ မန်စီးတီးအသင်း နည်းပြ ဂွါဒီယိုလာကမူ ၂၀၁၅ ခုနှစ်တွင် သက်တမ်းကုန်ဆုံးမည့် ဘာနာဒိုဆေးလ်ဗား၏ တစ်ပတ် ပေါင်တစ်သိန်းခွဲတန် စာချုပ်ကို တစ်ပတ်လုပ်ခ တိုးမြှင့်ပေးပြီး သက်တမ်းတိုးသွားရန် စီစဉ်နေကြောင်း သိရသည်။
ဘာနာဒိုဆေးလ်ဗားကို ကလပ်အသင်းအများအပြားက စိတ်ဝင်စားခဲ့ပြီး ဆော်ဒီကလပ် အယ်လ်ဟီလာက တစ်နှစ် ပေါင် ၇၅ သန်းတန်စာချုပ်ဖြင့် ကမ်းလှမ်းခဲ့ကာ လာလီဂါထိပ်သီးကလပ် ဘာစီလိုနာအသင်းကလည်း ပစ်မှတ်ထားလျက်ရှိသည်။
