ဆော်ဒီကလပ် အယ်လ်နာဆာအသင်းသို့ ပြောင်းရွှေ့ခဲ့သည့် ဆီနီဂေါလက်ရွေးစင်တောင်ပံတိုက်စစ်ကစားသမား မာနေက ဘိုင်ယန်မြူးနစ်အသင်းမှ ထွက်ခွာခဲ့ရသည့် အတွက် နာကျင်စွာခံစားရကြောင်း ပြောကြားခဲ့သည်။ ထို့ပြင် မာနေက ဘိုင်ယန်မြူးနစ်အသင်းတွင် ၎င်းဆန္ဒရှိသည့်အရာများနှင့် ဆန့်ကျင်ဘက်ဖြစ်ခဲ့ကြောင်းလည်း ဝန်ခံခဲ့သည်။
မာနေသည် အယ်လ်နာဆာ ၂၀၂၇ ခုနှစ်အထိသက်တမ်းရှိမည့် ၄ နှစ်စာချုပ် ချုပ်ဆိုခဲ့ကြောင်းသိရသည်။ “FC ဘိုင်ယန်အသင်းက ထွက်ခွာရတာဟာ ကျွန်တော့်ကို နာကျင်စေပါတယ်။ ခြားနားတဲ့အဆုံးသတ်မှုတစ်ခုကိုပဲ ကျွန်တော် ဆန္ဒရှိခဲ့တာပါ။ ဒီရာသီမှာ ကျွန်တော် အသင်းကို ကူညီနိုင်ခဲ့တယ်ဆိုတာ သိပါတယ်။ ဒီရာသီမှာ လူတိုင်းကို ကျွန်တော် သက်သေပြချင်ခဲ့တာပါ။ သို့သော်ငြားလည်း ကလပ်နဲ့ပရိသတ်များ အနာဂတ်မှာ အကောင်းဆုံးဖြစ်ပါစေဖို့ ဆုတောင်းရုံသာ ရှိပါတော့တယ်”ဟု မာနေက Sky Sports သို့ ပြောကြားခဲ့သည်။
မာနေအနေဖြင့် အယ်လ်နာဆာအသင်းတွင် တစ်နှစ် ယူရို သန်း ၄၀ ရရှိမည်ဖြစ်ပြီး ၎င်း၏ပြောင်းရွှေ့ ကြေးမှာမူ ယူရို သန်း ၃၀ ဖြစ်ကြောင်း သတင်းများက ဖော်ပြခဲ့သည်။ ၎င်းသည် ဘိုင်ယန်အသင်းတွင် ဒဏ်ရာပြဿနာ၊ အသင်းဖော်ဖြစ်သူ ဆာနေးနှင့် ခိုက်ရန်ဖြစ်ပွားမှုများ ရှိခဲ့သော်လည်း ပြိုင်ပွဲစုံ ၃၈ ပွဲ ကစားခဲ့ရပြီး ၁၂ ဂိုးသွင်းယူကာ ခြောက်ဂိုးဖန်တီးပေးခဲ့ကြောင်း သိရသည်။
