မန်ယူအသင်းခေါင်းဆောင် ဘရူနိုဖာနန်ဒက်စ်က အသင်းဖော်ကွင်းလယ်ကစားသမား မေဆန်မောင့်သည် ၎င်းတို့အသင်း လိုအပ်နေသည့် ကစားသမားဖြစ်ပြီး အသင်းကို အောင်မြင်မှုများ ရရှိအောင် ကူညီပေးမည့်သူဖြစ်ကြောင်း ချီးကျူးပြောကြားခဲ့သည်။
အသက် ၂၄ နှစ်အရွယ်ရှိ အင်္ဂလန်လက်ရွေးစင်ကွင်းလယ်ကစားသမား မေဆန်မောင့်သည် ယခုနွေရာသီအပြောင်းအရွှေ့ကာလတွင် ချယ်လ်ဆီးအသင်းမှ မန်ယူအသင်းထံသို့ Add-ons ကြေးအပါအဝင် ပေါင် သန်း ၆၀ ဖြင့် ပြောင်းရွှေ့လာခဲ့သူဖြစ်သည်။
၎င်းသည် ယခုမန်ယူအသင်း၏ ရာသီကြိုခြေစမ်းပွဲစဉ်များတွင် အသင်းအတွက် ငါးပွဲ ပါဝင်ကစားပေးထားသည်။ မေဆန်မောင့်အနေဖြင့် မန်ယူအသင်းအတွက် ငါးပွဲကစားရာတွင် ဂိုးသွင်းယူနိုင်ခြင်းမရှိသေးသလို ဂိုးဖန်တီးမှုလည်း ပြုလုပ်ပေးနိုင်ခြင်း မရှိသေးပေ။ သို့သော် ယခုနွေတွင် မန်ယူအသင်း၏အသင်းခေါင်းဆောင်သစ်အဖြစ် ခန့်အပ်ခံခဲ့ရသည့် ဘရူနိုဖာနန်ဒက်စ်က မေဆန်မောင့်မှာ ၎င်းတို့အသင်း လို အပ်နေသည့် ကစားသမားဖြစ်ကြောင်း ပြောကြားခဲ့ခြင်းဖြစ်သည်။
ဘရူနိုဖာနန်ဒက်စ်က “မေဆန်မောင့်လို တိုက်ပွဲဝင်စိတ်ဓာတ်ပြင်းထန်ပြီး အသင်းအတွက် အစွမ်းကုန်ပေးဆပ်တဲ့ ကစားသမားမျိုး ကျွန်တော်တို့ လိုအပ်နေတာပါ။ အဲဒီလို ကစားသမားတွေနဲ့ ပြိုင်ဘက်အဖြစ် ယှဉ်ပြိုင်ကစားရတာကို နှစ်သက်သလို အဲဒီလိုကစားသမားနဲ့ အသင်းဖော်ဖြစ်ရတာကို ကျွန်တော် ပိုပြီးနှစ်သက်ပါတယ်။ မေဆန်မောင့်ဟာ အသင်းကို အောင်မြင်မှုတွေ ရရှိအောင် ကူညီပေးမယ့်သူဖြစ်ပြီး ကျွန်တော့်အနေနဲ့ သူ့ကို ကာကွယ်ပေးနိုင်ဖို့ ဘာမဆိုလုပ်သွားမှာပါ” ဟု ပြောကြားခဲ့သည်။
ထို့ပြင် ဘရူနိုဖာနန်ဒက်စ်က မေဆန်မောင့်သည် စိတ်ဓာတ်သန်မာသူသာမဟုတ်ဘဲ ကွင်းလယ်နေရာစုံတွင် ကစားနိုင်သူဖြစ်ကြောင်းလည်း ချီးကျူးပြောကြားခဲ့သည်။ မေဆန်မောင့်သည် မန်ယူအသင်း၏ ရာသီကြို ခြေစမ်းပွဲများတွင် ကွင်းလယ်တိုက်စစ်နေရာစုံတွင် ကစားခဲ့ရသလို၊ ကွင်းလယ်ခံစစ်နေရာတွင်လည်း ကစားခဲ့ရကြောင်း သိရသည်။
ဘရူနိုဖာနန်ဒက်စ်က “ပြီးခဲ့တဲ့ နှစ်နှစ်လောက်တုန်းက မေဆန်မောင့်ဟာ ပရီးမီးယားလိဂ် အကောင်းဆုံးကစားသမားတွေထဲက တစ်ဦးလို့ ကျွန်တော် ပြောခဲ့ဖူးပါတယ်။ အသင်းမှာ သူ ရှိနေတာကို ကျွန်တော် ပျော်ပါတယ်။ သူဟာ နံပါတ် ၁၀၊ နံပါတ် ၈ နဲ့ တောင်ပံနေရာတွေမှာ ကစားနိုင်ပါတယ်။ ပြီးတော့ Press လုပ်တာလည်း အရမ်းကောင်းတယ်။ သူ့ဆီက သွင်းဂိုးတွေနဲ့ ဂိုးဖန်တီးမှုတွေကိုလည်း ကျွန်တော်တို့ မျှော်လင့်နိုင်ပါတယ်။ မန်ယူအသင်းမှာ သူ ခြေစွမ်းပြနိုင်ပါလိမ့်မယ်”ဟု ပြောကြားခဲ့သည်။
