အာဆင်နယ်အသင်း၏ နည်းပြ အာတီတာသည် ယခုနွေရာသီတွင် အပြောင်းအရွှေ့အသုံးစရိတ် ပေါင်သန်း (၂၀၀)ကျော် သုံးစွဲထားပြီးဖြစ်သော်လည်း ကစားသမား သစ်အချို့ ထပ်မံခေါ်ယူအားဖြည့်သွားရန် ဆန္ဒရှိနေဆဲဖြစ်ကြောင်း သိရသည်။
အာဆင်နယ်အသင်းသည် ယခုနွေရာသီအပြောင်းအရွှေ့ကာလတွင် ဝက်စ်ဟမ်းအသင်းမှ အင်္ဂလန်ကွင်းလယ်ကစားသမား ဒက်ကလန်ရိုက်စ်ကို Add-ons ကြေး အပါအဝင် ပေါင်(၁၀၅)သန်း၊ ချယ်လ်လ်ဆီးမှ ဂျာမန်တိုက်စစ်ကစားသမား ဟာဗက်ဇ်ကို ပေါင်(၆၅)သန်း၊ အေဂျက်စ်မှ နယ်သာလန်နောက်ခံလူ တင်ဘာကို ပေါင်(၃၈.၆)သန်းဖြင့် ခေါ်ယူခဲ့သောကြောင့် စုစုပေါင်းအသုံးစရိတ် ပေါင်(၂၀၈.၆)သန်း ရှိခဲ့ပြီဖြစ်သည်။
ထို့ကြောင့် ပရီးမီးယားလိဂ်တွင်သာမက ဥရောပဘောလုံးလောကတွင်ပါ ငွေကြေးအများဆုံး သုံးစွဲထားသည့်ကလပ်အသင်းအဖြစ်လည်း ဦးဆောင်လျက်ရှိသည်။ အာဆင်နယ်အသင်းသည် ဟာဗက်ဇ်၏ အပြောင်းအရွှေ့ကို ဇွန်လအတွင်းမှာပင် အပြီးသတ်နိုင်ခဲ့သော်လည်း ဒက်ကလန်ရိုက်စ်နှင့် တင်ဘာတို့ကို လက်မှတ်ရေးထိုးနိုင်ရန်ကိုမူ ဇူလိုင်လလယ်အထိ လုပ်ဆောင်ခဲ့ရသည်။
တင်ဘာ၏အပြောင်းအရွှေ့ကို သောကြာနေ့နှင့် ဒက်ကလန်ရိုက်စ်၏ အပြောင်းအရွှေ့ကို စနေနေ့ညပိုင်းတွင် အာဆင်နယ်အသင်းက ကြေညာခဲ့ခြင်းဖြစ်ပြီး နှစ်ဦးစလုံးကို ကာလရှည်စာချုပ် ချုပ်ဆိုထားကြောင်း ထုတ်ပြန်ခဲ့သည်။ ၎င်းတို့အတွက် ပေးချေရ မည့်ပြောင်းရွှေ့ကြေးကို ဖော်ပြခြင်းမရှိသော်လည်း ဒက်ကလန်ရိုက်စ်အတွက် ကနဦးပြောင်းရွှေ့ကြေး ပေါင်သန်း (၁၀၀) နှင့် Add-ons ကြေး ပေါင်(၅)သန်း၊ တင်ဘာအတွက် ကနဦးပြောင်းရွှေ့ကြေး ပေါင် (၃၄)သန်းနှင့် Add-ons ကြေး ပေါင် (၄.၅)သန်း ပေးချေရမည်ဖြစ်ကြောင်း ဗြိတိန်သတင်းဌာနများက ဖော်ပြခဲ့သည်။
ဒက်ကလန်ရိုက်စ်အတွက် ပေးချေရမည့် ကနဦး ပြောင်းရွှေ့ကြေး ပေါင်သန်း (၁၀၀) မှာ ၂၀၂၁ ခုနှစ် နွေ ရာသီတွင် ဗီလာမှ မန်စီးတီးအသင်းသို့ ပြောင်းရွှေ့ခဲ့သည့် အင်္ဂလန်လက်ရွေးစင်ကစားသမား ဂရီးလစ်ရှ်၏ စံချိန်နှင့် တူညီသွားမည်ဖြစ်သလို Add-ons ကြေး ပါဝင်လျှင် ဗြိတိန်ကစားသမားများအတွက် စံချိန်သစ်ဖြစ်သည်။
ထို့ပြင် ၎င်း၏ပြောင်းရွှေ့ကြေးမှာ ပြီးခဲ့သည့် ဇန်နဝါရီတွင် ဘင်ဖီကာမှ ချယ်လ်ဆီးအသင်းသို့ ရောက်ရှိလာသည့် အာဂျင်တီးနားကွင်းလယ်လူ အန်ဇိုဖာနန်ဒက်ဇ်၏ ပေါင် (၁၀၅.၆)သန်းပြီးလျှင် ပရီးမီးယားလိဂ်အတွက် ဒုတိယပြောင်းရွှေ့ကြေးအမြင့်ဆုံးခေါ်ယူမှုအဖြစ် မှတ်တမ်းဝင်မည်ဖြစ်သည်။ အာဆင်နယ်အသင်းသည် ကစားသမားသစ်နှစ်ဦးစလုံးကို ၂၀၂၈ ခုနှစ် အထိ (၅)နှစ်စာချုပ်ချုပ်ဆိုထားပြီး တစ်နှစ်တိုးမြှင့်နိုင်သည့်အချက်လည်း ပါဝင်ကြောင်း သိရသည်။
အာဆင်နယ်အသင်းသည် အရည်အသွေးမြင့်ကစားသမား(၃)ဦးကို ခေါ်ယူနိုင်ခဲ့ခြင်းကြောင့် ပြီးခဲ့သည့်ရာသီ ပရီးမီးယားလိဂ်ချန်ပီယံဆု စိန်ခေါ်နိုင်ခဲ့သည့်အသင်းထက် ပိုမိုတောင့်တင်းသွားပြီဟု သုံးသပ်မှုများ ရှိနေသော်လည်း အာတီတာက စိတ်တိုင်းကျခြင်းမရှိသေးဘဲ ထပ်မံအား ဖြည့်သွားရန် ဆန္ဒရှိနေကြောင်း သိရသည်။
အာတီတာသည် အနည်းဆုံးကစားသမားသစ်နှစ်ဦး ထပ်မံခေါ်ယူရန် ဆန္ဒရှိနေခြင်းဖြစ်ပြီး အသင်းမှ ထွက်ခွာရန် နီးစပ်နေသည့် ကွင်းလယ်ကစားသမား ပါတေး၏နေရာကို အစားထိုးရန်နှင့် အထောင်တိုက်စစ်မှူးတစ်ဦးဖြစ်ကြောင်း သိရသည်။ သို့သော် လက်ရှိအချိန်တွင် ကစားသမားရောင်းချမှုကို ဦးစားပေးလုပ်ဆောင်ဖွယ်ရှိကြောင်း သိရသည်။
