စပါးအသင်းမှ အင်္ဂလန်အသင်းခေါင်းဆောင်ဖြစ်သူ ဟာရီကိန်းသည် ယခုနွေရာသီအပြောင်းအရွှေ့ကာလတွင် ဘွန်ဒစ်လီဂါချန်ပီယံ ဘိုင်ယန်မြူးနစ်သို့ ပြောင်းရွှေ့ရန်သာ ဦးစားပေးစဉ်းစားနေကြောင်း သတင်းများက ဖော်ပြခဲ့သည်။
ဘိုင်ယန်မြူးနစ်သို့ ဟာရီကိန်းပြောင်းရွှေ့လာရန် အသင်း၏စီမံခန့်ခွဲမှုဘုတ်အဖွဲ့ဝင် ရူမင်နစ်ဂီက သိမ်းသွင်းစည်းရုံးထားပြီး ဖြစ်သည်ဟုလည်း သိရသည်။ ဘိုင်ယန်မြူးနစ်အသင်းသည် ပေါင်သန်း ၆၀ ဖြင့် ပထမအကြိမ်ကမ်းလှမ်းမှု ပယ်ချခံခဲ့ရသည့်အတွက် ဟာရီကိန်းကို အရခေါ်ယူနိုင်ရန် ပေါင် သန်း ၈၀ ဖြင့် ထပ်မံ ကမ်းလှမ်းရန် စီစဉ်နေကြောင်း ဗြိတိန်မီဒီယာများက ဖော်ပြခဲ့သည်။
ဘိုင်ယန်မြူးနစ်အသင်းသည် စပါးအသင်းမှ ထွက်ခွာရန် ဆန္ဒရှိနေသည့် အင်္ဂလန်တိုက်စစ်မှူး ဟာရီကိန်းကို ခေါ်ယူရန် ကြိုးပမ်းနေခြင်းဖြစ်ပြီး ပေါင်သန်း ၆၀+Add-ons ကြေးဖြင့် ပထမအကြိမ် ကမ်းလှမ်းခဲ့ရာ ပယ်ချခံခဲ့ရသည်။ ဟာရီကိန်း(၂၉ နှစ်)သည် ယခင်နှစ်များက ရီးယဲလ်နှင့် မန်စီးတီးတို့ပါ ခေါ်ယူရန် စိတ်ဝင်စားသည့် တိုက်စစ်မှူးတစ်ဦးဖြစ်ခဲ့သော်လည်း ယခုနွေရာသီတွင်မူ ဘိုင်ယန်မြူးနစ်နှင့် မန်ယူအသင်းတို့သာ ခေါ်ယူရန် ကြိုးပမ်းခဲ့ကြောင်း သိရသည်။
၎င်းအနေဖြင့် ၂၀၂၃-၂၄ ဘောလုံးရာသီအကုန်တွင် အသင်းနှင့် စာချုပ်သက်တမ်းကုန်ဆုံးမည်ဖြစ်ပြီး စာချုပ်သစ်ချုပ်ဆိုရန် ဆန္ဒမရှိတော့သောကြောင့် စပါးအသင်းသည် ပြောင်းရွှေ့ကြေးအလွတ်ဖြင့် လက်မလွှတ်ရစေရန် ယခုနွေရာသီကာလတွင် မဖြစ်မနေရောင်းချရမည့်အနေအထားသို့ ရောက်ရှိနေသည်။
ဟာရီကိန်းသည် ပရီးမီးယားလိဂ် ဂိုးသွင်းအများဆုံးကစားသမားဖြစ်လိုသည့် မျှော်လင့်ချက်အတွက် ပြည်ပကလပ်အသင်းများထံ ပြောင်းရွှေ့ကစားရန်ထက် ပရီးမီးယားလိဂ်ပြိုင်ဘက်အသင်းများထံ ပြောင်းရွှေ့ကစားရန် ပိုမိုလိုလားခဲ့သော်လည်း စပါးအသင်းဥက္ကဋ္ဌ လီဗီက ခွင့်ပြုလိုခြင်းမရှိခဲ့ပေ။ လီဗီက ပရီးမီးယားလိဂ် ပြိုင်ဘက်အသင်းများထံ ရောင်းချရမည်ဆိုပါက မြင့်မားသည့် ပြောင်းရွှေ့ကြေးရရှိရန်လိုလားနေပြီး ပြည်ပကလပ်များအတွက်မူ စျေးနှုန်းတစ်မျိုး သတ်မှတ်ထားကြောင်းလည်း ဗြိတိန်မီဒီယာအချို့က အတိအလင်း ရေးသားခဲ့သည်။
ထို့ကြောင့် ဘိုင်ယန်မြူးနစ်အသင်းက ပေါင်သန်း ၆၀ ဖြင့် ကမ်းလှမ်းခဲ့ခြင်းဖြစ်ပြီး စပါးအသင်းက လက်မခံဘဲ ပယ်ချခဲ့သည်။ ယင်းအတွက် ယခုအခါ ပေါင်သန်း ၈၀+Add-ons ကြေးဖြင့် ထပ်မံကမ်းလှမ်းရန် စီစဉ်နေခြင်းဖြစ်ပြီး ဟာရီကိန်းနှင့် ပုဂ္ဂိုလ်ရေး သဘောတူညီမှုရရှိထားပြီဟုလည်း သတင်းထွက်နေသည်။
ချယ်လ်ဆီးအသင်း၏ နည်းပြဟောင်းဖြစ်သည့် လက်ရှိဘိုင်ယန်မြူးနစ်အသင်းနည်းပြ သောမတ်စ်တူဟယ်လ်သည် ပရီးမီးယားလိဂ်မှ ကစားသမားများကို ခေါ်ယူရန် စိတ်အားထက်သန်နေပြီး ဟာရီကိန်းအပြင် မန်စီးတီးအသင်းမှ အင်္ဂလန်နောက်ခံလူ ဝေါ်လ်ကာကိုလည်း ပစ်မှတ်ထားနေကြောင်း သိရသည်။
