ဘာစီလိုနာအသင်းမှ ခေါ်ယူထားသည့် ဘရာဇီးလ်ကြယ်ပွင့်တိုက်စစ်မှူး ဗစ်တာရိုကေးသည် လက်ရှိ ၂၀၂၃ ခုနှစ်အတွင်း ဘောလုံးကမ္ဘာ၏ အသက် (၂၀)နှစ်အောက် ပရော်ဖက်ရှင်နယ်ဘောလုံးသမားများထဲတွင် ဂိုးပါဝင်ပတ်သက်မှုအများဆုံးကစားသမားအဖြစ်ရပ်တည်နေကြောင်းသိရသည်။
ဗစ်တာရိုကေးသည် လက်ရှိတွင် ဘရာဇီးလ်ကလပ် အက်သလက်တီကိုပါရာနန်စီအသင်းတွင်ကစားနေပြီး လာမည့် ၂၀၂၄ ခုနှစ်တွင် ဘာစီလိုနာအသင်းနှင့်လာရောက် ပူးပေါင်းမည်ဖြစ်သည်။
အသက် (၁၈)နှစ်အရွယ်ရိုကေးသည် အက်သလက်တီကိုပါရာနန်စီအသင်းအတွက် ၂၀၂၃ ခုနှစ်အတွင်း ပြိုင်ပွဲစုံ (၄၁)ပွဲကစားပေးထားရာတွင် ဂိုးပါဝင်ပတ်သက်မှု (၂၈)ကြိမ် (၂၀ ဂိုးသွင်း၊ ၈ ဂိုးဖန်တီး)အထိရှိခဲ့ပြီး အသက် (၂၀)အောက်ကစားသမားများတွင် အရေအတွက်အများဆုံးပြုလုပ်ထားသူအဖြစ် မှတ်တမ်းဝင်ခဲ့ခြင်းဖြစ်သည်။
