ရီးယဲလ်အသင်း၏ ကစားသမားသစ် ဘယ်လင်ဟမ်သည် ဆယ်လ်တာဗီဂိုနှင့်ပွဲတွင် တစ်ဂိုးထပ်မံသွင်းယူခဲ့ပြီးနောက် စီရော်နယ်လ်ဒို တင်ရှိထားသည့် စံချိန်မှတ်တမ်းကောင်းကို လိုက်မီသွားခဲ့ကြောင်း သိရသည်။
ဒေါ့မွန်အသင်းမှ ရီးယဲလ်အသင်းသို့ ယူရို(၁၀၃)သန်းဖြင့် ပြောင်းရွှေ့လာခဲ့သည့် အင်္ဂလန်ကွင်းလယ်ကစားသမား ဘယ်လင်ဟမ်သည် စပိန်မြေတွင် ခြေစွမ်းပြလျက်ရှိပြီး လာလီဂါအဖွင့်(၃)ပွဲဆက် ဂိုးသွင်းယူနိုင်ခဲ့သည်။
(၃)ပွဲတွင် (၄)ဂိုးသွင်းယူနိုင်ခဲ့ခြင်းဖြစ်ပြီး စီရော်နယ်လ်ဒိုနောက်ပိုင်း ပထမဆုံးစွမ်းဆောင်နိုင်သည့် ကစားသမားအဖြစ်လည်း မှတ်တမ်းဝင်ခဲ့သည်။
စီရော်နယ်လ်ဒိုသည် ၂၀၀၉ နွေရာသီတွင် မန်ယူမှ ရီးယဲလ်သို့ ပြောင်းရွှေ့ခဲ့ပြီးနောက် ၂၀၀၉-၁၀ ရာသီ လာလီဂါပြိုင်ပွဲ၏ အဖွင့်(၃)ပွဲတွင် ဘယ်လင်ဟမ်နည်းတူ (၄)ဂိုး သွင်းယူနိုင်ခဲ့ခြင်းဖြစ်သည်။
ထို့ပြင် အဆိုပါရာသီ၌ စီရော်နယ်လ်ဒိုအနေဖြင့် လာလီဂါအဖွင့်(၄)ပွဲဆက် ဂိုးသွင်းယူနိုင်ခဲ့သောကြောင့် ဘယ်လင်ဟမ်အနေဖြင့် ယင်းမှတ်တမ်းအား လိုက်မီနိုင်ဦးမလားဆိုသည်ကိုမူ လာမည့်ပွဲစဉ်တွင် စောင့်ကြည့်ရမည်ဖြစ်သည်။
ဆယ်လ်တာဗီဂိုအသင်းကို အနိုင်ရသည့်ပွဲတွင် ချယ်လ်ဆီးအသင်းထံမှ အငှားဖြင့် ခေါ်ယူထားသည့် ဂိုးသမား ကယ်ပါက ပထမဆုံးပွဲဦးထွက်ပွဲစဉ်အဖြစ် ပါဝင်ကစားခဲ့ပြီး ဘယ်လင်ဟမ်က ၎င်းအား ပွဲအပြီးတွင် ရီးယဲလ်ပရိသတ်များထံသို့ ခေါ်ဆောင်သွားကာ အသိအမှတ်ပြုစေခဲ့သည်။
ထို့ ကြောင့် ရီးယဲလ်ပရိသတ်အချို့က ဘယ်လင်ဟမ်သည် ဦးဆောင်မှုအရည်အသွေးရှိသူဖြစ်ပြီး ရီးယဲလ်အသင်း၏ အနာဂတ်အသင်းခေါင်းဆောင်ဖြစ်လာနိုင်သူဟု ချီးကျူးခဲ့ကြသည်။
ဘယ်လင်ဟမ်သည် အသက် (၂၀)သာရှိသေးသော်လည်း တည်ငြိမ်ရင့်ကျက်သည့်ကစားသမားဖြစ်ကြောင်း အသင်းဖော်များကလည်း ချီးကျူးထားကြသည်။
