မန်စီးတီးအသင်းခေါင်းဆောင် ကိုင်လီဝေါ်လ်ကာက ဂွါဒီယိုလာဟာ လက်ရှိဖြစ်ပျက်နေတဲ့အနေအထားတွေကို ပြင်ဆင်ဖို့ စီစဉ်နေကြောင်း ထုတ်ဖော်ပြောကြားလိုက်ပါတယ်။ စီးတီးဟာ ရလဒ်တွေဆိုးဝါးမှုတွေကြောင့် ၂၀၁၉ – ၂၀ နောက်ပိုင်း ပထမဆုံးအကြိမ် ချန်ပီယံဆုပြိုင်ပွဲကနေ ထွက်ခွာရဖို့ နီးစပ်နေပါတယ်။
ဗီလာကိုအရေးနိမ့်ခဲ့ပြီးနောက် ဂွါဒီယိုလာက လက်ရှိအသင်းအခြေအနေတွေကို ပြောင်းလဲဖို့ ပြင်ဆင်နေပြီး ဝေါ်လ်ကာကလည်း စပိန်သားဟာ လာမယ့်အဲဗာတန်နဲ့ ဘောက်ဆင်ဒေးပွဲအတွက် ပြင်ဆင်ဖို့ ပြောကြားခဲ့ကြောင်း ဆိုလိုက်ပါတယ်။ Podcast တစ်ခုမှာ ဝေါ်လ်ကာက “ကံကောင်းတာက အတိတ်မှာတုန်းက ကျွန်တော်တို့ ခရစ္စမတ်နေ့မှာ လေ့ကျင့်ခန်းမဆင်းပါဘူး။ ဒီရာသီမှာတော့ ကျွန်တော်တို့ လုပ်ဆောင်ပါမယ်။ ဘာလို့လဲဆိုတော့ ကျွန်တော်တို့ အဲဗာတန်နဲ့ပွဲကန်ရမှာမလို့ပါ။ ဒါပေမယ့် ပြီးခဲ့တဲ့ရာသီတွေတုန်းက ကျွန်တော်တို့ ခရစ္စမတ်နေ့ကို နားပါတယ်။ အဲ့တာက အရမ်းကောင်းပါတယ်”လို့ ဖြေကြားခဲ့ပါတယ်။ အခုအပတ်အစောပိုင်းတုန်းက ဝေါ်လ်ကာကိုယ်တိုင် ခရစ္စမတ်နေ့မှာ သူ့ဇနီးသည် အန်နီ ၊ ကလေး ၄ ယောက်နဲ့အတူ အနားယူဖို့ ပြင်ဆင်ထားတာဖြစ်ပါတယ်။
ဒါပေမယ့်လည်း ဂွါဒီယိုလာရဲ့ပြောင်းလဲလိုက်တဲ့အစီအစဉ်ကြောင့် ဝေါ်လ်ကာအနေနဲ့ သူ့အစီအစဉ်ကို ဖျက်သိမ်းရဖွယ်ရှိနေပါတယ်။ စီးတီးဟာ လာမယ့်ဘောက်ဆင်ဒေးမှာ အဲဗာတန်နဲ့ရင်ဆိုင်ရမှာဖြစ်ပြီး အဲ့နောက် ဒီဇင်ဘာ ၂၉ ရက်နေ့မှာ လက်စတာနဲ့ အခုနှစ်ကို နှုတ်ဆက်ရမှာဖြစ်ပါတယ်။
