ရီးယဲလ်မက်ဒရစ်အသင်းသည် အသင်း၏ စပိန်လက်ရွေးစင်တောင်ပံကစားသမား အဆန်စီယို (၂၆ နှစ်)အား စာချုပ်သစ်ချုပ်ဆိုရန် ကမ်းလှမ်းမည်မဟုတ်ဘဲ ပြောင်းရွှေ့ကြေးယူရိုသန်း (၃၀)ရရှိပါက ယခုနွေရာသီအပြောင်းအရွှေ့ကာလတွင် ရောင်းချသွားရန် ဆန္ဒရှိနေကြောင်း စပိန်အားကစားသတင်းစာ Marca ကဖော်ပြခဲ့သည်။
စပိန်လက်ရွေးစင်အသင်းအတွက် နိုင်ငံတကာပွဲ (၂၈)ပွဲကစားပေးထားသူ အဆန်စီယိုသည် ရီးယဲလ်မက်ဒရစ်အသင်းနှင့် စာချုပ်သက်တမ်းတစ်နှစ်သာ ကျန်ရှိတော့သူဖြစ်ပြီး ယခုနွေရာသီအပြောင်းအရွှေ့အစောပိုင်းကာလကတည်းက ရီးယဲလ်အသင်းမှထွက်ခွာတော့မည်ဟု သတင်းများထွက်ပေါ်ခဲ့သူဖြစ်သည်။
အဆန်စီယိုသည် ကြံ့ခိုင်မှုပြဿနာများနှင့်အတူ ရီးယဲလ်အသင်းတွင် ပုံမှန်ပွဲထွက်ခွင့်ရရန် ရုန်းကန်နေရသူဖြစ်ပြီး လာမည့် ၂၀၂၂ ကမ္ဘာ့ဖလားတွင် စပိန်အသင်းနှင့်အတူ ပါဝင်ခွင့်ရရန်အတွက် ပုံမှန်ပွဲကစားခွင့်ရသည့်အသင်းတစ်သင်းသို့ပြောင်းရွှေ့ရန် ဆန္ဒရှိနေခြင်းဖြစ်သည်။
အဆန်စီယိုအားခေါ်ယူရန် အင်္ဂလန်ကလပ်အသင်းများဖြစ်သည့် အာဆင်နယ်၊ လီဗာပူးလ်တို့နှင့် အီတလီကလပ် အေစီမီလန်အသင်းတို့က အပြိုင်ပစ်မှတ်ထားနေကြောင်း သိရသည်။
