ဥရောပလိဂ်ပြိုင်ပွဲမှ ကစားသမားခေါ်ယူမှုများကို ဆော်ဒီကလပ်အသင်းများ ဆက်လက်ပြုလုပ်နေပြီး ပြောင်းရွှေ့ကြေးအသုံးစရိတ် ယူရို သန်း ၁၅၀ နီးပါး ရှိလာ

ဥရောပလိဂ်ပြိုင်ပွဲမှ ကစားသမားခေါ်ယူမှုများကို ဆော်ဒီကလပ်အသင်းများ ဆက်လက်ပြုလုပ်နေပြီး ပြောင်းရွှေ့ကြေးအသုံးစရိတ် ယူရို သန်း ၁၅၀ နီးပါး ရှိလာကြောင်း သိရသည်။

အယ်လ်နာဆာအသင်းက အင်တာအသင်းမှ ခရိုအေးရှားဝါရင့်ကွင်းလယ်လူ ဘရိုဇိုဗစ်ကို ယူရို ၁၈ သန်း၊ အယ်လ်အစ်တီဟတ်အသင်းက ဆဲလ်တစ်အသင်းမှ ပေါ်တူဂီတောင်ပံကစားသမား ဂျိုတာတို့ကို ယူရို ၂၉ ဒသမ ၁ သန်းဖြင့် ခေါ်ယူပြီးနောက် ပြောင်း ရွှေ့ကြေး အသုံးစရိတ်စုစုပေါင်းမှာ ယူရို ၁၄၃ ဒသမ ၆ သန်းအထိ ရှိလာခဲ့သည်။ 

အယ်လ်နာ ဆာအသင်းနှင့် သုံးနှစ်စာချုပ်ချုပ်ဆိုခဲ့သူ ဘရိုဇိုဗစ်(၃၀ နှစ်)သည် အင်တာအသင်းသို့ ၂၀၁၅ ခုနှစ်ကတည်းက အငှားကစားသမားအဖြစ် စတင်ရောက်ရှိခဲ့သူဖြစ်ပြီး ပွဲပေါင်း ၃၀၀ ကျော် ကစားပေးခဲ့သူဖြစ်သည်။ ၎င်းကို ဘာစီလိုနာအသင်းက ခေါ်ယူရန် စိတ်ဝင်စားခဲ့သော်လည်း တစ်နှစ်လစာ ယူရိုသန်း ၃၀ ဝန်းကျင်ရရှိမည့် အယ်လ်နာဆာအသင်းကို ရွေးချယ်ခဲ့ခြင်းဖြစ်ကြောင်း သိရသည်။ 

ဂျိုတာ(၂၄ နှစ်)သည် ၂၀၂၁ ခုနှစ်တွင် ဘင်ဖီကာအသင်းမှ ဆဲလ်တစ်အသင်းသို့ ကနဦးအငှားဖြင့် ရောက်ရှိခဲ့ပြီး ပြီးခဲ့သည့်နှစ် နွေရာသီကမှ အပြီးသတ်ခေါ်ယူခဲ့ကာ ငါးနှစ်စာချုပ် ချုပ်ဆိုထားခြင်းဖြစ်သည်။ ၎င်းသည် ဆဲလ် တစ်အသင်းတွင်ကစားခဲ့သည့် နှစ်ရာသီအတွင်း ပြိုင်ပွဲစုံ ၈၃ ပွဲကစားကာ ၂၈ ဂိုးသွင်း၊ ၂၆ ဂိုးဖန်တီးပေးခဲ့သည်။

ဘရိုဇိုဗစ်နှင့် ဂျိုတာမတိုင်မီ ဆော်ဒီလိဂ်တွင် အယ်လ်ဟီလယ်အသင်းက ဝုလ်ဗ် မှ ပေါ်တူဂီလက်ရွေးစင်ကွင်းလယ်လူ နေးဗက်စ်ကို ယူရို ၅၅သန်း၊ ချယ်လ်ဆီးမှ ဆီနီဂေါ နောက်ခံလူ ကူလီဘလီကို ယူရို ၂၃ သန်း၊ အယ်လ်အာလီအသင်းက ချယ်လ်ဆီးမှ ဆီနီဂေါလက်ရွေးစင်ဂိုးသမား အက်ဒူအာမန်ဒီကို ယူရို ၁၈ သန်းဖြင့် အသီးသီးခေါ်ယူထားခြင်းဖြစ်သည်။ အယ်လ်အာလီအသင်းသည် လီဗာပူးလ်ကစားသမားဟောင်း ဖေမီနိုကိုလည်း သုံးနှစ်သက်တမ်းရှိစာချုပ် ချုပ်ဆိုပြီးခေါ်ယူထားသည်။

 ရီးယဲလ်မက်ဒရစ်၊ ချယ်လ်ဆီး အသင်းများနှင့် စာချုပ်သက်တမ်းကုန်ဆုံးခဲ့သော ပြင်သစ်ကစားသမားများဖြစ်သည့် ဘန်ဇီမာနှင့် ကွန်တေတို့ကို အယ်လ်အစ်တီဟတ်အသင်းက ပြောင်းရွှေ့ကြေးအလွတ်ဖြင့် ခေါ်ယူနိုင်ခဲ့သော်လည်း လစာငွေမြင့်မားစွာ ပေးချေရဖွယ်ရှိကြောင်း သိရသည်။ ဘန်ဇီမာသည် အသင်းနှင့် နှစ်နှစ်စာချုပ်ကို လက်မှတ်ရေးထိုးထားပြီး စာချုပ်တန်ဖိုး ပမာဏာမှာ ယူရို သန်း ၄၀၀ အထိရှိခဲ့သည်။ 

ကွန်တေမှာမူ အသင်းနှင့် လေးနှစ်သက်တမ်းရှိ စာချုပ်တစ်ရပ်ကို လက်မှတ်ရေးထိုးထားပြီး တစ်နှစ်လျှင် ယူရို ၈၆ သန်းအထိ ရရှိမည်ဖြစ်ကြောင်း သိရသည်။ ဆော်ဒီလိဂ်သို့ ထပ်မံရောက်လာဖွယ်ရှိသည့် ကစားသမားများစာရင်းတွင် နေမာက ဦးဆောင်နေပြီး ဇီယာ့ရှ်ကလည်း ရောက်လာနိုင်ခြေရှိသူအဖြစ် နီးစပ်လျက်ရှိသည်။ မက်ဆီ၊ လူကာကူ၊ ဆွန်ဟောင်မင်၊ မိုဒရစ်၊ ဗာဒီစသည့် ဘောလုံးသမားများအပြင် နည်းပြ မော်ရင်ဟိုတို့မှာ ဆော်ဒီလိဂ်သို့သွားရောက်ရန် ငြင်းဆန်ခဲ့သည်။