ဘာစီလိုနာနှင့်စပိန်ကွင်းလယ်ကစားသမား ပတ်ဒရီသည် ၂၀၂၁ ခုနှစ် Golden Boy ဆုကို ဆွတ်ခူးနိုင်ခဲ့ကြောင်း သိရသည်။
ဥရောပအကောင်းဆုံးလူငယ်ကစားသမားဆုအဖြစ် ထင်ရှားသည့် အဆိုပါ Golden Boy ဆုကို အီတလီအားကစားသတင်းစာ Tuttosport က ၂၀၀၃ ခုနှစ်တွင် စတင်ဖန်တီး ချီးမြှင့်ခဲ့ခြင်းဖြစ်ပြီး
လက်ရှိအချိန်တွင်မူ ဥရောပထိပ်တန်းသတင်းစာများလည်း ပူးပေါင်းပါဝင်ကာ မဲပေးရွေးချယ်မှု ပြုလုပ်ပေးလျက်ရှိကြောင်း သိရသည်။
ယခုဆုအတွက် ရွေးချယ်ခံရရန်အကျုံးဝင်သူမှာ အသက်(၂၁)နှစ်အောက် ကစားသမားဖြစ်ပြီး ဥရောပနိုင်ငံများမှ အဆင့်မြင့်ဆုံးလိဂ်ပြိုင်ပွဲများတွင် ပါဝင်ကစားနေသူဖြစ်ရမည်ဖြစ်သည်။
ယခုနှစ်အပါအဝင် စုစုပေါင်း(၁၉)ကြိမ်၌ တိုက်စစ်မှူးများက (၁၀)ကြိမ်ရရှိကာ အများဆုံးဖြစ်ခဲ့ပြီး နိုင်ငံအလိုက်တွင် ပြင်သစ်၊ ကလပ်အသင်းအလိုက်တွင် မန်ယူကစားသမားများက အများဆုံးရရှိခဲ့သည်။
ပတ်ဒရီသည် ၂၀၀၅ ခုနှစ်က မက်ဆီ ရရှိခဲ့ပြီးနောက်ပိုင်း ဘာစီလိုနာကစားသမားများထဲမှ ပထမဆုံးရယူနိုင်သူအဖြစ် မှတ်တမ်းဝင်ခဲ့သည့်အပြင် ဒုတိယနေရာမှ ကစားသမားကို အမှတ်အများဆုံးဖြတ်နိုင်သည့်ကစားသမားအဖြစ်လည်း စံချိန်တင်ခဲ့သည်။
ဂျာနယ်လစ်(၄၀) ဦးက မဲပေးခဲ့ရာတွင် ပတ်ဒရီကို ပထမနေရာ၌ ရွေးချယ်သူ (၂၄)ဦးအထိရှိခဲ့ပြီး စုစုပေါင်း (၃၁၈)မှတ်ရရှိခဲ့သည်။
ဒုတိယနေရာမှ ဘယ်လင်ဟမ်ထက် (၁၉၉)မှတ် အသာရခဲ့သောကြောင့် စံချိန်သစ် ဖြစ်ခဲ့ခြင်းလည်းဖြစ်သည်။
